ທ່ານ ໂທນືນ ຊຽນ, ຜູ້ອໍານວຍການໃຫຍ່ຂອງບໍລິສັດ ຟໍເຕ ລາວ. ທ່ານ ໂທນືນ ມີປະສົບການຫຼາຍກວ່າ 20 ປີໃນຂະແໜງທະນາຄານ ແລະ ການເງິນ, ເປັນຜູ້ນໍາດ້ານທຸລະກິດ ແລະ ການດຳເນີນທຸລະກິດຂອງບໍລິສັດປະກັນໄພ, ທະນາຄານທຸລະກິດ ແລະ ສະຖາບັນການເງິນຕ່າງໆ. ທ່ານ ໂທນືນ ເນັ້ນໜັກການຄວບຄຸມທຸລະກິດ ແລະ ການດໍາເນີນງານຂອງອົງກອນຢ່າງກວ້າງຂວາງ ຕັ້ງແຕ່ການຄຸ້ມຄອງການພັດທະນາທຸລະກິດ, ທຸລະກິດລະບົບທະນາຄານ ແລະ ການຊໍາລະສະສາງ, ທຸລະກິດຕົວແທນ, ການຂາຍແລະ ການຕະຫຼາດ, ການຂະຫຍາຍສາຂາ ແລະ ການລະດົມທຶນ. ທ່ານ ໂທນືນ ຍັງເປັນທີ່ຮູ້ຈັກກັນດີໃນນາມຄູຝຶກບັນລະຍາຍ, ຄູຝຶກທຸລະກິດ, ວິທະຍາກອນ ແລະ ເປັນນັກເວົ້າຕໍ່ໜ້າມວນຊົນ ໃນດ້ານການບໍລິຫານການເງິນ ແລະ ການວິເຄາະການລົງທຶນ, ການບໍລິຫານການຂາຍ, ການບໍລິຫານການດໍາເນີນງານດ້ານທຸລະກິດ ແລະ ພາວະຜູ້ນໍາ. ທ່ານ ໂທນືນ ຈົບລະດັບການສຶກສາປະລິນຍາໂທດ້ານການຄຸ້ມຄອງຄວາມສ່ຽງດ້ານການເງິນ, ການທະນາຄານ ແລະ ການປະກັນໄພ (RMBFI) ຈາກມະຫາວິທະຍາໄລ de Nantes (University de Nantes), ປະເທດຝຣັ່ງ ແລະ ປະລິນຍາໂທບໍລິຫານທຸລະກິດ (MBA) ຈາກມະຫາວິທະຍາໄລແຫ່ງຊາດກຳປູເຈຍ.

ທ່ານ ເຣມອນ ລິມ, ຮອງຜູ້ອໍານວຍການ ຊີ້ນໍາວຽກງານການດໍາເນີນງານ ຂອງບໍລິສັດ ຟໍເຕ ລາວ. ທ່ານ ເຣມອນ ຮັບຜິດຊອບໃນການຕິດຕາມດ້ານກິດຈະກໍາການດໍາເນີນງານພາຍໃນບໍລິສັດ ແລະ ຈັດຕັ້ງປະຕິບັດດໍາເນີນງານທຸລະກິດທີ່ດີທີ່ສຸດ ເພື່ອໃຫ້ເກີນຄວາມພໍໃຈຂອງລູກຄ້າ. ນອກຈາກໜ້າທີ່ຮັບຜິດຊອບຕົ້ນຕໍແລ້ວ, ທ່ານ ເຣມອນ ຍັງເປັນຄະນະທີ່ປຶກສາຂອງສະມາຄົມປະກັນໄພລາວ. ທ່ານ ເຣມອນ ມີປະສົບການຫຼາຍກວ່າ 40 ປີໃນຂະແໜງອຸດສາຫະກໍາປະກັນໄພທົ່ວໄປ. ທ່ານ ເຣມອນ ໄດ້ເຮັດວຽກກັບບໍລິສັດປະກັນໄພທົ່ວໄປທີ່ສໍາຄັນສອງແຫ່ງໃນ ນະຄອນກົວລາລໍາເປີ, ປະເທດມາເລເຊຍ ຊື່ງເປັນຜູ້ຈັດການອາວຸໂສຂອງຂະແໜງອອກສັນຍາ ແລະ ຂະແໜງຮຽກຮ້ອງສິນທົດແທນປະກັນໄພ. ທ່ານ ເຣມອນ ຍັງເປັນຜູ້ຈັດການທົ່ວໄປຂອງບໍລິສັດປະກັນໄພທົ່ວໄປຊັ້ນນໍາໃນປະເທດບຣູໄນດາຣູຊາລາມ ກ່ອນທີ່ຈະເຂົ້າຮ່ວມບໍລິສັດ ໂຕໂກຈາຢາ ລາວ ປະກັນໄພ ໃນປີ 2014, ເຊິ່ງໄດ້ມາເປັນ ບໍລິສັດ ຟໍເຕ ໃນປີ 2018. ທ່ານ ເຣມອນ ແມ່ນສະມາຊິກຂອງສະຖາບັນປະກັນໄພ (ACII) ແລະ ຜູ້ປະກັນໄພ (Chartered Insurer).

ທ່ານ ຮີໂຣກິ ໂອກະໂມະໂຕະ (ໂອກະ), ຮອງຜູ້ອໍານວຍການ ຊີ້ນໍາວຽກງານທຸລະກິດ ຂອງບໍລິສັດ ຟໍເຕ ລາວ ແລະ ເປັນຫົວໜ້າທຸລະກິດປະຈໍາພາກດ້ານການຂາຍຂະແໜງທຸລະກິດຍີ່ປຸ່ນ ໃນປະເທດກໍາປູເຈຍ. ທ່ານ ຮີໂຣກິ ເຂົ້າຮ່ວມກຸ່ມບໍລິສັດ ຟໍເຕ ໃນປີ 2018 ແລະ ໄດ້ຍ້າຍມາປະຈໍາ ຢູ່ ສປປ ລາວ ພາຍຫຼັງທີ່ ຟໍເຕ ເຂົ້າຊື້ກິດຈະການຂອງ ບໍລິສັດ ໂຕໂກຈາຢາ ລາວ ປະກັນໄພ ໃນອະດີດ. ທ່ານ ຮີໂຣກິ ໄດ້ສ້າງຕັ້ງທີມງານການຂາຍຂະແໜງທຸລະກິດຍີ່ປຸ່ນ ຢູ່ທີ່ກຸ່ມບໍລິສັດ ຟໍເຕ ແລະ ກາຍເປັນຜູ້ຊ່ຽວຊານດ້ານການປະກັນໄພທີ່ປະຈໍາການຄົນທໍາອິດ ໃນຂະແໜງທຸລະກິດລູກຄ້າຍີ່ປຸ່ນ ຂອງປະກັນໄພທົ່ວໄປໃນ ສປປ ລາວ. ພາຍໃນ 4 ປີຂອງການດໍາເນີນງານ, ທ່ານ ຮີໂຣກິ ໄດ້ປະສົບຜົນສໍາເລັດໃນການຂະຫຍາຍຕົວຂອງທຸລະກິດ ເພື່ອບັນລຸສ່ວນແບ່ງທາງການຕະຫຼາດອັນດັບຕົ້ນຂອງຕະຫຼາດປະກັນໄພຍີ່ປຸ່ນໃນ ສປປ ລາວ. ທ່ານ ຮີໂຣກິ ເລີ່ມຕົ້ນເຮັດວຽກທໍາອິດຢູ່ທີ່ ທະນາຄານໂຕກຽວ Mitsubishi UFJ Co., Ltd ໃນປີ 2010. ທ່ານ ຮີໂຣກິ ໄດ້ຮັບປະສົບການຢ່າງກວ້າງຂວາງໃນຂະແໜງທະນາຄານ ສໍາລັບບໍລິສັດຈົດທະບຽນຕະຫຼາດຫຼັກຊັບ, ໂດຍສະເພາະແມ່ນການສະໜອງທຶນຂອງໂຄງການ, ເງິນກູ້ຢືມ, ແລະ ການເງິນສໍາລັບການຄວບທຸລະກິດ ແລະ ການຊື້-ຂາຍກິດຈະການ ໂດຍເປັນ ຜູ້ຈັດການຝ່າຍພົວພັນທຸລະກິດ. ທ່ານ ຮີໂຣກິ ຈົບການສຶກສາລະດັບປະລິນຍາຕີດ້ານປະຫວັດສາດ - ສາຂາວິຊາປະຫວັດສາດໃນອາຟຣິກາ - ທີ່ມະຫາວິທະຍາໄລຄາລິຟໍເນຍ, ລອສແອງເຈລິສ (UCLA), ສະຫະລັດອາເມລິກາ.